Пӗррӗмӗш каналпа пыракан «Непутевые заметки с Дмитрием Крыловым» кӑларӑмра Чӑваш Ен пирки кӑтартӗҫ
Нумаях пулмасть ӳкерӳ ушкӑнӗ Етӗрне округӗнчи Тури Ачакри 19-мӗш ӗмӗрти чӑваш хресченӗн музейӗнче пулнӑ. Федераци каналӗн журналисчӗсене «Вирьял» халӑх ансамбль, музей ӗҫченӗсемпе шкул ачисем пирӗн халӑхӑн йӑли-йӗркипе паллаштарнӑ.
Хӑнасем Сӑр хӗрринче те пулнӑ, вӑрҫӑ ҫулӗсенче унта хӳтӗлев чикки тунӑ вырӑнсене курнӑ. Унтан Етӗрнери ӳнерпе тавра пӗлӳ тата СССР халӑх артисчӗ Н.Д.Мордвинов ячӗллӗ музейсенче кадрсем ӳкернӗ.
Кӑларӑма курмасӑр ан юлӑр! Вӑл ҫӗртмен 8-мӗшӗнче тата 15-мӗшӗнче эфира тухӗ.
Етӗрне округӗнчи Чаканар пурӑнакан 44 ҫулти арҫын 2019 ҫулта Мари Элте пурнӑҫра йывӑр лару-тӑрӑва лекнӗ арҫынпа паллашнӑ. 2020 ҫулта вӑл ӑна хӑйӗн хуҫалӑхӗнче ӗҫлеме сӗннӗ. Лешӗ килӗшнӗ.
Вӑл ӑна хӑйӗн патне илсе килнӗ, пурӑнма юрӑхсӑр ҫӗрте вырнаҫтарнӑ та кашни кун стройка, ҫӗр, ытти ӗҫпе ӗҫлеттернӗ. Анчах укҫине тӳлемен, йӗркеллӗ апат ҫитермен. Ӗҫлеме килӗшмесен вара хӗненӗ.
2023 ҫулхи ҫу уйӑхӗнче вӑл тепӗр арҫынна илсе килнӗ, Шупашкарта стройкӑна вырнаҫтарма шантарнӑ. Анчах ӑна та леш арҫын пек тӳлевсӗр ӗҫлеттернӗ, выльӑх пӑхтарнӑ.
Пӗлтӗр ҫу уйӑхӗнче ҫав икӗ арҫын тарма пултарнӑ, пӗлӗшӗсенчен пулӑшу ыйтнӑ. Лешсем вара кун пирки йӗрке хуралне пӗлтернӗ.
Етӗрне арҫынни тӗлӗшпе пуҫарнӑ пуҫиле ӗҫе суд пӑхса тухӗ.
Етӗрне тӑрӑхӗнчи арҫынна васкавлӑ медпулӑшу тухтӑрӗсем иккӗмӗш пурнӑҫ парнеленӗ теме пулать. Ака уйӑхӗн 10-мӗшӗнче вӑл ӗҫе кайма тухнӑ. Ӑнсӑртран кӑкӑрӗ тӗлӗнчен ыратма тытӑннӑ, сывлама йывӑр пулнӑ. Вӑл тӳрех машинине чарнӑ та васкавлӑ медпулӑшу чӗннӗ.
Анатолий Мурзин фельдшер, Марина Гаврилова медсестра, Алексей Ломоносов водитель вырӑна часах ҫитнӗ. Тухтӑрсем пациентӑн инфаркт пулнине ӑнланнӑ, часрах тромболезис тунӑ. Ҫак препарат юн тымарӗнчи тромба ирӗлтерет. Кун хыҫҫӑн арҫынна пульницӑна илсе ҫитернӗ.
«Инфаркт чухне пӗрремӗш сехет – чи пӗлтерӗшли. Тромболезис вӑхӑтра тусан чӗрене ҫӑлма пулать. Ҫавӑнпа кӑкӑр тӗлӗнчен ыратнине туйсанах васкавлӑ медпулӑшӑва шӑнкӑравлӑр», - теҫҫӗ тухтӑрсем.
Республикӑра Чӑваш автономи облаҫӗ йӗркеленнӗренпе 105 ҫул ҫитнине паллӑ тума хатӗрленеҫҫӗ. Ҫавна май тӗрлӗ мероприяти ирттерме палӑртнӑ.
Кӑҫал «Земля вкуса» гастрономи фестивалӗ пӗрремӗш хут иртӗ. Малтанлӑха палӑртнӑ тӑрӑх, унта 40 регионти производительсем хутшӑнӗҫ. Ҫавӑн пекех «Руҫ ӑстисем», «Раҫҫейӗн симӗс ылтӑнӗ», «Раҫҫей ҫӑлкуҫӗсем», «Раҫҫей чунӗ. Атӑлҫи» фестивальсем иртӗҫ. Ҫырла фестивалӗ те пулӗ.
Аса илтерер: кӑҫал Республика кунӗ Шупашкарта тата Етӗрне округӗнче иртӗ. Етӗрнере уявра хӑмла музейӗ уҫӑлӗ.
Ӗнер каҫхине Етӗрне тата Муркаш округӗсен чиккинче М-7 ҫул ҫинче «Лада Веста» водителӗ пӑшие ҫапса кайнӑ. Чӗрчун ҫул урлӑ каҫнӑ. Шел те, пӑши вилмеллех аманнӑ.
Аварире 40 ҫулти пассажирка суранланнӑ. Тӑнне ҫухатнӑскере пульницӑна илсе кайнӑ.
Ҫакӑ паллӑ: 1983 ҫулта ҫуралнӑ водитель ӳсӗр пулман.
Сӑмах май, пӗлтӗр республикӑри ҫулсем ҫинче 32 пӑшие ҫапса хӑварнӑ.
Етӗрне округӗн хаҫачӗ «Ӗҫ ялавӗ» 95 ҫул тултарнӑ. Ҫак кунсенче калем ӑстисем юбилея савӑнӑҫлӑ лару-тӑрура паллӑ тунӑ.
Пӗрремӗш номер 1930 ҫулта «Колхоз спутникӗ» ятпа тухнӑ. Ку таранччен унӑн ячӗ темиҫе те улшӑннӑ.
Паянхи кун «Ӗҫ ялавӗ» чӑвашла тата вырӑсла тухса тӑрать. Пӗтӗмпе – 3386 экземпляр. Вӗсенчен 2220-шӗ – вырӑсла, 1166-шӗ – чӑвашла.
Шупашкарта пурӑнакан Мария Столярова паян 105 ҫул тултарнӑ. Мария Михайловна 1920 ҫулта Муркаш районӗнчи Нискасси ялӗнче ҫуралнӑ. Ачаранах вӗренме ӑнтӑлнӑскер Горькинчи (халӗ — Чулхула) педагогика институтне вӗренме кӗнӗ. 1940 ҫулта вӑл Етӗрне районӗнчи Янӑм шкулӗнче ӗҫлеме тытӑннӑ. Вӑрҫӑ ҫулӗсенче шкул ачисемпе пӗрле вырӑнти колхозра нумай тӑрӑшнӑ.
1948-1970 ҫулсенче вӑл маларах асӑннӑ районти Урпаш шкулӗнче ачасене нимӗҫ чӗлхи вӗрентнӗ. 1970-1972 ҫулсенче Шупашкарти 6-мӗш вӑтам шкулта ӗҫленӗ.
Мария Михайловнӑн ача-пӑча пулман, анчах чун юратӑвне вӑл хӑй вӗрентнӗ ачасене панӑ. Паян ӑна тӑванӗн хӗрӗ Нина Петровна пӑхать.
Чӑваш Енри 9 территори туризм маршрутне кӗрӗ. Кун пирки республикӑн экономика аталанӑвӗн министрӗ Дмитрий Краснов «Контактри» хӑйӗн страницинче хыпарланӑ.
Шупашкарпа Йӑлӑм — санаторипе курорт туризмӗ валли юрӑхлӑ вырӑнсем. Куславккапа Сӗнтӗрвӑрри тӑрӑхӗсем юханшыв туризмӗн центрӗсем пулса тӑрӗҫ. Шупашкар тӑрӑхӗнче этника туризмне аталантарасшӑн, Етӗрне тӑрӑхӗ — юханшывпа агротуризма. Улатӑр тӑрӑхӗ паломниксене илӗртесшӗн. Муркаш тӑрӑхӗ Атӑл хӗрринче туристсем валли инфраструктурӑна аталантарӗ. Красноармейски тӑрӑхӗ юханшывсемпе тата кӳлӗсемпе хӑпартланасшӑн, Йӗпреҫ тӑрӑхӗ — кемпингпа глэмпинглӑ вӑрманлӑ вырӑнсемпе.
Шупашкарти Трактор тӑвакансен культура керменӗнче пуш уйӑхӗн 22-мӗшӗнче Пӗтӗм Раҫҫейри хор фестивалӗн регионти тапхӑрӗ иртӗ.
Унта Элӗк, Патӑрьел, Вӑрнар, Йӗпреҫ, Канаш, Куславкка, Комсомольски, Красноармейски, Хӗрлӗ Чутай, Сӗнтӗрвӑрри, Муркаш, Ҫӗрпӳ, Шупашкар, Ҫӗмӗрле, Етӗрне, Елчӗк тӑрӑхӗсенчи, Улатӑр, Канаш, Ҫӗнӗ Шупашкар, Шупашкар тата Ҫӗмӗрле хулисенчи 59 вокалпа хор коллективе хутшӑнӗ.
Пушӑн 1-мӗшӗнче Чӑваш патшалӑх филармонине ЧР тава тивӗҫлӗ артистки, Москонцерт солистки Ирина Шоркина «Я признаюсь» концерт программипе килӗ.
Вӑл – пирӗн ентеш, Етӗрне тӑрӑхӗнче ҫуралса ӳснӗ. Ирина Шоркина Шупашкарти концертра хӑйӗн вырӑс тата чӑваш юррисене, романссем, эстрадӑри хитсене юрлӗ.
Чӑваш патшалӑх филармонине унӑн илемлӗ, чӗрӗ сассипе киленме чӗнеҫҫӗ.
+18.3 °C